Ta an BLAG SEO BOGTHA GO http://andrumamornuacht.blogspot.com/

Thug mé iarraidh dul isteach ar shuíomh nua Comhar. http://www.comhar-iris.ie/ Ach níl rud ar bith ann ach 'hostbasket' i mBéarla, i bhFraincis agus san Ollanais. Cad é go díreach atá ag titim amach le Comhar?<
Tá fiche scéal cloiste agam a thugann orm smaoineamh gur cheart do dhaoine greim a choinneáil ar an chéad eagrán den Comhar Nua atá i ndiaidh a bheith foilsithe. Más fíor do na scéalta seo níl gach rud ag dul go breá le Comhar Nua, a mhalairt, agus is am corrach atá i ndán don iris sa ré nua atá díreach tosaithe.
Coinneoidh mé sibh ar an eolas faoin scéal oiread agus a dtig liom ach idir an dá linn gabh amach agus ceannaigh do chóip den iris - anois!
Más údar dóchais don iris nua tá mé i ndiaidh mo chóip de a cheannach sa Cheathrú Póilí sa Chultúrlann. Dúirt bean an tsiopa liom gurb é sin an dara lasta de Comhar a bhí faighte aici le cúpla lá anuas, gur díoladh amach an chéad 10 gcóip a fuarthas an tseachtain seo thart. Má dhéanann go leor againn é ba 'comhar' go mbeadh rath ar an Chomhar Nua.

Beidh teacht le chéile do chuid de Ghaeil Bhéal Feirste i bParlús an Ard Mhéara, Tom Hartley, amárach ag am lóin. Cara le pobal Gaelach na cathrach agus leis an Chultúrlann é Tom agus tá dreim le hócáid spleodrach a bheith ann ag an ócáid i bhFoirgneamh Claredon.
Taobh leis an Pharlús tá Sráid Garmoyle. Ar ioróiní an tsaoil is ansin, faoi scath Oifig an Ard Mhéara Poblachtaigh ar Bhéal Feirste, a coinníodh ceannairí 1798 i ndiaidh an Éirí Amach. Tugadh cimí as Baile Átha Cliath agus na cimí as an tuaisceart le chéile agus coinníodh faoi ghlas iad thart ar an cheantar seo sular tugadh ar long iad a fhad le Garmoyle Pool agus as sin go Fort George in Albain. Gan dabht ar bith is minic a bhíonn an tArd Mhéara ag smaoineamh ar an dóigh a bhfuil roth na staire i ndiaidh casadh. É anois, mar Poblachtach, ar an saoránach is tábhachtaí sa chathair, agus aghaidh ag oifig s'aige leis an áit a céasadh is a coinníodh faoi ghlas daoine a raibh sé de mhisneach acu seasamh a thógáil mar Phoblachtaigh. Scéal a chuimhníonn an oiread is atá athruithe sa chathair mar a saolaíodh Poblachtachanas an chéad lá anuas.

Bhuail Gearóid Mac Adaim le Gregory Campbell aréir agus rinne an cás dó, arís eile, ar son Acht na Gaeilge. Níorbh éigean an cás a dhéanamh nó tá an argóint caillte ag an DUP fad ó shin faoin cheist seo. Tá a leithéid de reachtaíocht sa Bhreatain Bheag agus in Albain, tá na Sasanaigh féin i bhfách leis agus in ainneoin scairtí is blustar an DUP tá an tAcht geallta i gComhaontú Chill Rimhinn.
Ach chuaigh ceannaire Shinn Féin chuig Stormont aréir agus chuir sé an cás arís eile. Dar leis nach raibh sé muiníneach go mbbeadh dul chun cinn mar gheall ar an chruinniú sin ach dar leis go raibh sé le mothú ó Gregory go dtuigeann sé nach bhfuil ann ach ceist ama go mbeidh Acht na Gaeilge.
Ní chreidim go bhfaighfear Acht na Gaeilge go luath. Beidh troid le déanamh gach orlach den tslí, leis na hAontachtaithe agus leis na mandiríní i Stormont. Tá Gregory agus Edwin i ndiaidh an teocht a isliú do lucht na Gaeilge i dTeach Fuar na 6 Chontae. Agus biodh a fhios agat gur Teach Fuar atá ó Gregory agus a mhacasamhail. Creideann siad go mbrisfidh sin lucht na Gaeilge. An fear bocht.
Ach sin ráite tá Gregory ag dul a chaitheamh rud éigin ár dtreo, rud a bhaineann leis an Chairt Eorpach a chur i bhfeidhm ar bhealach níos treise ná mar a rinneadh.
Ní leor é ná baol air. Ach is beag ní nach cuidiú éigin é.
Tógaimid gach rud a thig ár mbealach agus gach rud a threisíonn an pobal Gaelach agus cás na Gaeilge. Nó bíodh Acht ann amárach nó i gceann bliana nó i gcionn trí bliana tá togáil pobal na Gaeilge le déanamh agus á dhéanamh i rith an ama.
Ach ní bheidh ár sásamh ann go dtí go mbeidh Acht againn.
Nó sa deireadh ciallódh Acht na Gaeilge go mbeadh aitheantas ann faoi dheireadh nach stát Aontachtach Béarla é seo a thuilleadh ach stát a bhfuil pobal le dílseachtaí éagsúla ann agus gur gá na dílseachtaí sin a aithint.
Is geall le nimh don Aontachtachas é sin. Rud nach fíor sa Bhreatain Bheag nó in Albain, mar ar féidir a bheith ar son an aontais agus a bheith ar son an teanga dúchais.
Is iomaí uair ráite gur gá do lucht na Gaeilge agus do náisiúnaigh agus do Chaitlicigh cúrsaí a eascú le go dtiocfadh le Protastúnaigh agus aontachtaithe bogadh leathorlaigh féin i dtreo na Gaeilge.
Ach tá gá le rud eile fosta, is gá do Aontachtaithe agus Protastúnaigh tosú ar a gceistiú féin faoi chultúr agus faoina seasamh aineolach faoin Ghaeilge.
Is gá dóibh a bheith á gcur féin ar an eolas faoina stair, faoina traidisiúin, faoina ról i náisiún na hÉireann agus dá réir.
A bheith oscailte don fhirinne cibé áit a thugann sé iad.
Gan sin ní bheidh mórán d'athrú mar atá agus mar a bhí ar dhearcadh an phobail Aontachtaigh faoin Ghaeilge.

Is deas a fheiceáil go mbeidh Maighread & TrionaNí Dhomhnaill ag seinm ar An Droichead, lárionad na Gaeilge i mBéal Feirste Theas, an tSatharn bheag seo, 25 Deireadh Fómhair. Mholfainn do dhuine ar bith a bhfuil faill acu dul a fhad leis nó tá scoth oíche cheoil i ndán. Bhí mé ag breathnú ar chlár ar TG4 an oíche faoi dheireadh faoin Bothy Band agus bhí agallamh le Tríona ann. Ar iomlán na mbuníonta ceoil traidisiúnta a tháinig chun cinn le 30 bliain anuas dearfainn gurb iad an Bothy Band is mó a chuaigh i bhfeidhm orm agus gurb iad ab fhearr orthu ar fad. Iad féin nó Planxty. Ach má ta tuairim agat féin scaoil amach é. Cuir post chugam. An t-am deireanach a sheinn muintir Uí Dhomhnaill i mBéal Feirste ar ndóigh bhí Micheál leo, ar dheis Dé go raibh a anam. Sheinn siad sa Chultúrlann chun 15 bliain den Chultúrlann a cheiliúradh. Tá ticéidí do ghig an tSathairn ar fáil ach dul i dteagmháil le Jim nó Ray ag Béal Feirste 90288818. Le fáil amach faoi chlár iomlán na n-imeachtaí ag An Droichead gabh chuig, www.androichead.com

Briseadh ar Peter Robinson agus a bhuíon ag Clontibret na blianta fada ó shin agus mura mbíonn sé ciallmhar is cúramach gach seans go mbrisfear ar Peter agus a bhuíon arís eile go luath.
De réir mar a thuigim níl Peter Robinson ag rá nach nglacfaidh sé le dilárú cumhachtaí póilíneachta. Díreach tá sé ag rá nach dtig leis e a dhíol le lucht 'orlach ar bith' sa pháirtí. Chun go dtiocfadh leis póilíneacht, cás na Gaeilge, srl a dhíol lena pháirtí tá roinnt roghanna ann. Thiocfadh leis a chur ina luí orthu go gcaithfidh siad glacadh le póilíneacht mar níl de rogha eile ann ach comhúdarás. Bíodh ról ag Sinn Féin i rialú na Sé Chontae nó bíodh ról ag Rialtas na hÉireann ann. Sin an rogha a tugadh do Paisley bliain go leith ó shin agus dhíol sé lena pháirtí é. Tá báta eile ag Robinson chun a pháirtí a bhogsadh ar an cheist seo. Toghchán. Scanraigh an UUP an DUP an tseachtain seo thart nuair a rinne an UUP comhaontú votála le Jim Allister agus an TUV. Is cuma cé chomh ar nós cuma liom is a bhí an DUP faoin chomhaontú seo, scanraíonn sé iad. Dá mbeadh toghchán ann is cinnte nach gcuirfeadh an DUP lena lucht tacaíochta, agus is baol go laghdófaí a vóta. Tá daoine sa DUP atá ag brú na hargóna sin. Agus tá siad ag comhairliú don DUP fosta gan a bheith ag brú toghchán cionn is gur sin díreach an rud a ba mhaith le Sinn Féin. Dar leo sin go bhfuil Sinn Féin i ndiaidh cúrsaí a shocrú le go mbeadh toghchán ann faoi cheist na póilíneachta, faoi cheist na Gaeilge, faoi cheist an 11+ srl. Agus seachas titim isteach i ngaiste Shinn Féin go mba cheart don DUP cinntiú de nach mbeadh toghchán ann agus nach dtiocfadh le Sinn Féin cur lena vóta. Cibé acu na cogair seo a bheith fíor nó gan a bheith fior is léir go bhfuil níos mó brú ar an DUP chun géilleadh ná mar a gcreidtear go póiblí. Tá súil as agam go ngéillfidh. Ach mar a dúirt mé anseo chomh fada siar le mí Lúnasa creidim go mbeidh toghchán ann roimh i bhfad agus go mba ghá toghchán sula dtuigfí an DUP nach bhfuil an dara rogha acu ach bogadh.

Ní nós liom a bheith ag cur suime san X Factor a bhíonn ag dul ar ITV. Bíodh sin soiléir sula dtosaim ar an bhlag seo.
Ach bhí mé ag casadh ó chainéal go cainéal,( sé chinn a bhfuil agam agus beirt acu sin doiléir) nuair a tharla ar ITV mé agus an t-ainm Eoghan scríofa i soilse móra lonnracha. Choinnigh sin mo shuim ann agus bhreathnaigh mé seal gur éist mé le hEoghan Quigg as Dún Geibhinn, agus é ag dul ceoil. Bhí sé maith go leor ag canadh agus iontach ionraic, lách, is deas mar dhuine (oiread is go dtig leat breithiúnas a thabhairt ar an bheagán a chuala is a bhfaca mé).
Imríonn Eoghan iomána do Chumann Chaoimhín Uí Loingsigh ar an bhaile agus chuala mé scéal scéal, nach bhfuil dearbhú agam air fós, go raibh sé ar naíscoil Neachtain ach nach deachaigh sé ar aghaidh chuig Bunscoil Ghaelach. D'fhéach mé le tuilleadh eolais a fháil faoi sin ar an idirlíon ach ní bhfuair mé ach 'fan sites' d'Eoghan agus go leor leor tuairiscithe nuachta faoi agus a pháirtíocht san X Factor. Bíodh sé fíor go raibh sé ar naiscoil Ghaeilge, nó ná bíodh b’fhiú a bheith ag cur ar a shon agus é i mbun an cheoil arís eile ar ball beag an tseachtain seo.
Tá sé tamall ó bhí buaiteoir CLG as Doire againn agus ba dheas Eoghan a bheith buacach sna seachtainí amach romhainn.
Go n-éirí leat a Eoghain.

Cá bhfuil Caitríona?
Tá cúrsaí ag scoil Movilla, mar a bhfuil stailc ag cur isteach ar oideachas páistí le seachtain anois, ina scannal. Agus caithfidh an tAire Oideachais gníomhú. Fiú mura bhfuil ann ach go rachadh Caitríona síos go Movilla, bualadh leis an dá thaobh agus ansin seasamh taobh amuigh den scoil chun a insint do thuairisceoirí go bhfuil na cainteanna ag dul ar aghaidh agus go bhfuil sí muiníneach go mbeidh dea-scéal ann gan mhoill.
Fiú féin mura ndéanfaí ach an méid sin, chruthófaí go bhfuil ról le himirt ag Caitríona, gréim éigin aici ar chúrsaí.
Seachas sin tá Sinn Féin i ndiaidh ligean do gach páirtí eile labhairt faoin cheist seo os comhair na gcamearaí agus Caitríona a bheith ceilte ó na meáin.
Tá Caitríona Ruane ar dhuine de na polaiteoirí is fearr agus is cumasaí sna Sé Chontae. Am ar bith a chuirtear amach i measc an phobail í téann sí i bhfeidhm ar dhaoine.
Téann sí i bhfeidhm orthu nuair a bhuaileann sí leo, nuair a théann sí ag míniú a cháis dóibh, nuair a éisteann sí leo. Chonaic mé sin mé féin fiche uair cheana.
Chonaic mé é níos luaithe i mbliana nuair a bhí mé ag Gaelscoil an Traonaigh i Lios na Sceithe nuair a d’oscail sí an scoil ann go hoifigiúil. Bhí daoine iontach spreagtha agus díograiseach bheith léi, bualadh léi, plé léi.
Ach seachas an tallann atá Caitríona a úsáid, seachas ligean do dhaoine aithne a chur ar Chaitríona, éisteacht léi, agus dá réir ní fheicimid Caitríona ach sa bheag.
Cuirtear go Movilla í ar maidin agus cuirtear os comhair an phobail í ag míniú a cáis!

Níl a fhios agam cad é an 'eitiquette' atá ann faoi phoiblíocht d'Airí agus dá réir ag Stormont. Ach tá sé tábhachtach nach ligeann Sinn Féin do cibé nósmaireacht a bhí ann roimhe a leanúint ar aghaidh, nach ngéilleann said d'aon rud a chuirfeadh bac ar phoiblíocht a nAirí féin a bheith faoi smacht ag Sinn Féin agus ní ag lucht Stormont. Bristear ar an nósmaireacht más gá.
Bhí Preas Oifig thar a bheith éifeachtach thar blianta na trioblóide. Caithfidh siad a bheith níos éifeachtaí fós am na síochána.
Caithfidh Sinn Féin i gcónaí cuimhneamh air (agus tá mé cinnte de go gcuimhníonn siad air) gur fuath le go leor de na mandaríní sa státseirbhís ag Stormont, gur fuath leo Sinn Féin, gur déistín leo an pobal as ar eascair Sinn Féin agus gach a bhaineann le Sinn Féin.
IS IAD AN NAMHAD IAD!

Seo iad na daoine a throid agus a throideann go fíochmhar i gcoinne Lá agus an Gaeloideachas agus Acht na Gaeilge agus fiche rud eile.
Ar go leor bealaí is é Stormont an líne tosaigh ag Poblachtaigh anois agus iad ag iarraidh gréim éigin a fháil ar chumhacht na státseirbhíseach, iad ab iarraidh smacht a chur ar na maorlathaigh sin atá agus a bhí ag rialú na háite seo. Na daoine a thabharfadh 'Abrasive Gaels' agus ainmneacha níos measa orainn nuair a bhí sé de dhanacht orainn bualadh leo ag lorg ár gcearta.
Tá dúshlán mhór roimh Shinn Féin agus romhainn uilig chun an buíon smachtúil sin ag Stormont a bhriseadh. Tús maith a bheadh ann dá ndéanfaí dul chun cinn i gcás Caitríona agus an Roinn Oideachais. Agus tá sé faoi Shinn Féin a bheith muiníneach, dána agus seiftiúil chun sin a dhéanamh.
Nó a luaithe is a bheidh na boic seo réidh le Caitríona Ruane tá sé ar intinn acu bogadh ar aghaidh chuig Michelle Gildernew agus chuig na hAirí eile de chuid Shinn Féin. Nó Aire ar bith eile a bhriseann ar an seanréimeas.
Lá agus oíche tá na daoine seo ar a ndícheall ag iarraidh an taoide a choinneáil siar. Agus caithfidh iad sin ar mhaith leo an scéal a athrú a bheith chomh díograiseach céanna agus níos díograisí fós.

Sa ghrianghraf thuas feictear ó chlé, Gearóid Ó Cairealláin, Eamann Ó Cianáinn agus an tAire Caitríona Ruane sa Chultúrlann le déanaí. Ba mhaith liom comhbhrón a dhul le hEamann ar cailleadh a bhean Mary ar na mallaibh, ar dheis Dé go raibh sí.

An bhfuil aon phrionsabal ar chor ar bith ag an UUP?
Duine deas é Reg Empey agus dá réir ach cad é an ciall atá leis an chomhaontú toghcháin nua atá acu leis an .....TUV!
Seo dream ar dhéistín leo Comhaontú Aoine an Cheasta, roinnt na cumhachta agus dá réir. Drream ar níos DUP iad ná an DUP féin. Is fuath le Jim Allister an DUP as a bheith ag feall ar an aontacht agus ar an chreideamh ach is mó fós is fuath leis an UUP a rinne a bhfeall níos luaithe agus níos mó ná an DUP.
Ach níor cheart iontas a bheith orainn. 'Nothing concentrates the mind like death in the morning' an sean nath cainte. Agus is baol don UUP go mbeidh an bás acumura dtig leo dul chun cinn éigin a dhéanamh sa chéad toghchán eile.
Tamall ó shin rinne an UUP dearmad ar fad ar a scrupallaí is a bhíonn siad faoi gan a bheith ag plé le 'urlabhraithe ar son lucht sceimhle.' Rinne siad socrú leis an PUP, páirtí polaitiúil a dhéanann ionadaíocht don UVF, agus bhain iomlán leasa astu.
Ansin d'éirigh siad mór leis an SDLP agus bhí caint ann faoi nascadh de shaghas éigin. Ba é seal an Pháirtí Coiméadaigh sa Bhreatain an chéad seal eile agus tá caint ag dul go fóill faoin dá pháirtí phósadh in athuair. Agus anois, an TUV. Is comhartha an éadóchais é seasamh seo an UUP.
Ach má tá siad ag iarraidh páirtnéir i ndáiríre tá siad ag amharc sa treo mícheart. Tá Enda O Cionnaith ag fanacht le scairt.

Is maith an rud an bheirt Brian, Cowen is Lenihan, a bheith ar an chos chúl, iad ag tabhairt le fios anois go mbeidh maolú ar a bplean chun cártaí leighis a bhaint de dhaoine thar 70 bliain d’aois. Ní hé nach bhfuil an pobal sna 26 Chontae ar an tuiscint gur gá ciorruithe a bheith ann. Díreach gur mhaith leo go mbeadh na ciorruithe sin ciallmhar agus cothrom agus is beag duine a gcreideann go bhfuil se cothrom nó ciallmhar tromaíocht ar dhaoine thar 70 bliain d’aois.
Ná go mba cheart cur le líon na ndaltaí i ranganna scoile. Tiocfaidh laghdú ar chaighdeán oideachais na bpáistí mar gheall ar an treoir sin. Agus mar a mhínigh Pilib Mac Cathmhaoil dom ar Raidió Fáilte, caillfidh múinteoirí a bpost dá bharr. Tá Pilib agus a chomhlacht físeáin TOBAR, ag déanamh clár 'cuileog ar an bhalla' do TG4 faoi trí scoileanna, Coláiste Feirste i mBéal Feirste, Gaelscoil ar Inis Eoghain agus Gaelscoil i gCorcaigh. I gCorcaigh an tseachtain seo thart agus Pilib ag déanmamh reidh do bhabhta eile scannánaithe bhí an fhoireann ag socrú cérbh iad an ceathrar múinteoir a chaillfidh a bpost mar gheall ar an mhéadú ar líon na ndaltaí i ngnách rang.
Is iontach go bhfuil Fianna Fáil oiread sin as teagmháil lena mbuntacaithe is go bhfuil siad ag moladh ciorruithe mar seo. Ach tá rud amháin cinnte. Tá an rialtas ó dheas ag gearradh siar agus leanfaidh siad ag gearradh siar. Agus gach seans gurb é an polasaí ceart gearradh siar o réimsí áirithe ag am nuair atá oiread sin neamhchinnteachta faoi chúrsaí eacnamaíochta.
A mhalairt atá ar bun ag Gordon Brown. Dar leat go bhfuil an fear sin, agus a rialtas, ag dul ar mire glan.
Ar dtús cheannaigh siad bunús na mbancanna móra sa Bhreatain le hairgead na n-íocóirí cánach. Moladh iad go mór as sin a dhéanamh! As airgead na n-íocóirí cánach a úsáid chun na bancanna a threisiú? Nach dtuigeann daoine gurb é airgead s’acu atá ann agus gur airgead é sin anois nach mbeidh le caitheamh ar scoileanna, ospidéil srl. Nach mothaíonn siad gurb é Northern Rock, an dream a cheannaigh Gordon Brown cúpla mí ó shin, atá ar an bhanc is díograisí ag ciceáil daoine amach as a dtithe cionn is nach dtig leo morgáiste a íoc?
Ach mura leor acu sin tá Alistar Darling i ndiaidh fógairt go bhfuil sé chun na billúin a infheistiú i dtograí tógála agus eile. Rud a spreagfaidh fostaíocht agus fás, b’fhéidir, agus a bheidh deathionchar aige ar infrastruchtúr na Breataine, b’fhéidir.
Tá sé chun na billiúin, nach bhfuil aige, a chaitheamh chun vótaí a cheannach seachas chun fadhbanna eacnamaíochta na Breataine a réiteach.
Na billiúin a gheobhaidh sé ó iasachtaí idirnáisiúnta!
B’fhéidir go bhfuil an ceart ag Gordon Brown agus a fhoireann gur féidir leat géarchéim a choinneáil ar chúl trí airgead a chaitheamh ina threo. B’fhéidir. Ach bhí an dearcadh sin ag baincéirí na Breeataine agus tchí Dia anois iad.