Ta an BLAG SEO BOGTHA GO http://andrumamornuacht.blogspot.com/

Ní díol iontais ar bith agam go bhfuil Conchúr O Liatháin, iareagarthóir ar Lá, ag carnadh leis na duaiseanna agus é ar ais anois i gCúl Aodha. An oíche faoi dheireadh sciob Conchúr leis an duais sa chomórtas blagála ag Duaiseanna Liteartha an Oireachtais. Ní gá ach spleachadh gasta ar a shuíomh, iGaeilge, le tuiscint cad chuige. Tá sé gleoite, dea-eagraithe, furasta a léamh agus bríomhar. Agus ábhar faoi chaibidil ann a bhaineann leis an lá inniu nó fiú féin an lá amárach. Tá an duais €1,000 urraithe ag Oifig na Gaeilge in Institiúid Teicneolaíochta Atha Cliath/DIT. Agus ba é fear as Cúl odha, Donnchadh O hAodha, a bhronn an duais ar Chonchúr, fear eile as Cúl Aodha!

Is é an blagadóireacht an todhchaí maidir leis na meáin Gaeilge. Ní hionann sin is a rá nach mbeidh gá le nuachtán laethúil, (tá, bhí agus beidh!) nó le foilseacháin i nGaeilge (deascéal go bhfuil Comhar ar ais i mbun gnóithe) ach is áis iontach iad na blaganna a ligeann don léitheoir eolas agus tuairimíocht a fháil láithreach, fiú agus eachtra ag titim amach. Mar aon leis sin tá i bhfad níos mó éagsúlachta tuairime is eolais sna blaganna ná mar atá i nuachtán, dá tharraingtí é. Agus tá blaganna níos tarraingtí do dhaoine óga ná mar a bhí nuachtáin riamh. Pobal blagadóireachta atá uainn i saol na Gaeilge agus ba cheart do na foilseacháin Gaeilge, ach cead a lorg, ábhar ó na blaganna Gaeilge a chur i gcló sna foilseacháin.

Comhghairdeas le Conchúr (agus le iGaeilge) agus ná bíodh léisc ar aon duine agaibh blag de bhur gcuid féin a chur ar bun. Ní chosnaíonn sé pingin féin. Is saoire athbheochan na teanga anois ná mar a bhí sé riamh roimhe!

digg it | del.icio.us