Ta an BLAG SEO BOGTHA GO http://andrumamornuacht.blogspot.com/

Is fada mé ag tabhairt amach do na péas agus do na húdaráis nach bhfuil mé sásta comhoibriú leo cionn is nach bhfuil siad sásta seirbhís a chur ar fáil i nGaeilge. Ach ní bhíonn ag aon rud ach a sheal. Agus tá an seal sin, a bhí fada go leor, ag teacht chun deiridh. Nó de réir dealraimh tá beirt phéas a bhfuil A Leibhéal sa Ghaeilge acu ar dhualgas leis an PSNI i mBéal Feirste Thiar. Léiríodh sin ar na mallaibh ag cruinniú de Bhord Phóilíneachta Bhéal Feirste Thiar. Anois, shíl Pádraig Mac Piarais, Caitliceach go smior, go mbeadh gliondar croí air dá dtiocfadh an lá nuair a bheadh páistí Sandy Row agus an tSeanchill ( i mBéal Feirste) ag díspeagadh ar an Phápa i nGaeilge. Agus sa spioraid céanna, cé gur deacair agam a bheith ag moladh péas sa tuaisceart, is mór liom go bhfuil an lá ag teacht nuair a bheidh mé in ann tabhairt amach do na péas i nGaeilge. Ach thóg sé fada orainn fáil a fhad leis seo - cá fios cé chomh fada uainn an lá nuair a bheidh muid in ann plé le péas i gceart in aon teanga sa chuid seo tíre. Ach níl amhras ach go bhfuil píosa siúlta againn ar an bhóthar. I 1985 dhiúltaigh mé foirm a líonadh isteach le seirbhís giúire a dhéanamh cionn is nach raibh ach foirm i mBéarla ann. Spreagadh comhfhreagras. Scríobh mé ar ais chucu agus chuir ar a súile dóibh go mbeinn breá sásta bheith ar ghiúire ach foirm dátheangach a bheith agam. Scríobh siad ar ais agus chuir líne dearg faoi mhír san fhoirm a luaigh 'if you for any reason fail to fill this in you may be liable to a fine of up to £500 and / or a period in prison.' Chuir mé ar ais chucu é agus scríobh 'ar eagla na míthuisceána níl rún dá laghad agam seo a líonadh isteach mura bhfaighim foirm dátheangach. In the absence of such, consider this correspondence closed.' Chuir siad ar ais chugam an foirm arís agus dhá líne dearg faoin mhír a luaigh fineál agus príosúnacht. Ach bhí píosa beag i litir leis a luaigh nach raibh aon iallach orthu faoi 'Northern Ireland Juries Act' seirbhís i nGaeilge a chur ar fáil. B'shin deireadh áfach. Níor thug siad mo sheans dom dul faoi ghlas ar son na Gaeilge - cé gur bhronn siad é ar Ghearóid O Cairealláin ar ball agus chuir eisean faoi ghlas ar feadh seachtaine.
Ach an t-am a scríobh mise bhí an Comhaontú Angla - Eireannaigh díreach sínithe agus Peter Barry ag fógairt go raibh deireadh le 'tromluí na náisiúnach' agus níor fhóir sé Gael aitheanta a chur go príosún ag an am. Mar sin is é an bhuairt atá orm anois go bhfuil péas le Gaeilge ann cé chomh fada go mbeidh lucht giúire ag teacht ar ais chugam. Ach smaoinigh air - 80 bliain a thóg sé, agus breis, chun go mbeadh an stát ó thuaidh sásta beirt a bhfuil A Leibhéal Gaeilge acu a chur san áit is mó Gaeil sa stát. Cén Gaeilge ar 'underwhelming.'

digg it | del.icio.us